Prison Torture
Custodial killing and tortures

Torture – 1. The Infliction of intense pain (as from burning, Crushing or Wounding) to Punish, coerce, or afford sadistic Pleasure.

சென்னைப் பல்கலைக்கழகத் தமிழ்ப் பேரகராதி

சித்திரவதை – சித்திரவதம் – வேதனைப் படுத்தி கொல்லுகை.

க்ரியா தற்காலத் தமிழ் அகராதி

சித்திரவதை – செயலாலோ சொல்லாலோ கொடுமையாக துன்புறுத்துதல்.

அகராதிகளும் பொருள்கூறுதலும் ஒரு குறிப்பிட்ட சமூகத்தில் பயன்பாட்டில் உள்ள சொற்களின் பொருளை அதன் பயன்பாட்டு அளவில் எடுத்துறைக்கின்றன. அந்தவகையில் மொழியில் ஒரு சொல் அதன் சமூக பயன்பாட்டைப் பொருத்து அதற்கான பொருளையும், சொல்லாட்சியையும் மேம்படுத்திக்கொள்கிறது,

                   சில சொற்களுக்கு இருக்கும் பலவேறு துறைசார்ந்த விளக்கங்களும் மிக விரிவாகவோ கூர்மையாகவோ அமையும் பொருள்கூறல்களுமே அந்த சொல்லை சமூக அளவில் உறுதிபடச் செய்கின்றன. அத்தகைய சொற்கள் காலமாற்றத்தை கடந்து சமூக மாற்றத்தோடு இணைந்து பலவாக வளர்ச்சி அடைகின்றன. அப்படி அமையும் சில சொற்கள் சமூகத்தின் உளவியலை பிரதிபலிப்பவையாக அமைவதும் உண்டு. அப்படி தமிழகத்தில் கடந்த நூற்றாண்டில் அதிகம் பயன்படுத்தப்பட்டு சமூக உளவியலை பிரதிபலிக்கும் மாபெரும் கருத்தியலை விதைத்த முற்ப்போக்கான வார்த்தைகளாக சிலவற்றை சொல்வோமானால் சுயமரியாதை, சமதர்மம், சமூகநீதி, ஒருமைப்பாடு, கல்வி,  சாதிமறுப்பு இவை சில நிலைகளில் ஒரு பெரும் சமூக பிரதிபலிப்பாக இல்லாவிட்டாலும் ஒரு முற்போக்கான சமூகத்தின் கனவுகளை சுமந்து நிற்கும் வார்த்தைகள் எத்தனை நூற்றாண்டுகளானாலும் அந்த வார்த்தைகளின் தேவையும் பயன்பாடும் அவசியமானவை. அதே வேளையில் இன்னொரு புறம் ஆதிக்க சக்திகளின் வார்த்தைகளாக அதிகம் உச்சரிக்கப்பட்ட ஒரு நூற்றாண்டிற்கான வார்த்தைகள் தேசத்துரோகி, சமூகவிரோதி, மதத்துரோகி, ஆண்டபரம்பரை, சாதிக்கலவரம், கௌரவக் கொலை (இந்நாளில் ஆணவக்கொலை) இவை விரோதத்தை, வன்முறையை, காட்டுமிராண்டி தனத்தைக் கூட்டி ஒரு வளர்ந்துவரும் சமூகத்தை மிகவும் பின்னோக்கி இழுத்துச் செல்பவை.

                   இந்த இரண்டு வகைப்பட்ட சொற்களின் பயன்பாடும் இணைந்துதான் நாம் வாழும் சமூகத்தின் மனசாட்சியை பிரதிபலிக்கின்றன. எனினும் இவற்றை மட்டும் வைத்து நம்மால் ஒரு சமூகத்தின் தோற்றத்தை பிரதிபலிப்பது நம்மை சில இடங்களில் மிகப்பெரிய சிக்கலுக்கு உள்ளாக்கும். அவற்றில் குறிப்பிடத்தக்க வார்த்தைகள் அதிகாரம் சார்ந்த, நமக்கு உரிமையில்லாது நம்மீது திணிக்கப்பட்டு செயல்படுத்தப்படும் செயல்கள் குறித்த சொற்கள் அவை  பொதுப்பயன்பாட்டில் இல்லாவிட்டாலும் பெரிய கூர்மையான  விளக்கங்களும் இல்லாவிட்டாலும் அவை நம்மிடம் ஏற்படுத்தும் பாதிப்புகள் அதிகம் அந்த சொற்கள் தன்னளவில் அதிகாரத்தையும், அச்சமூட்டும் தன்மையும் கொண்டிருக்கிறது. அப்படிப்பட்ட ஒரு வார்த்தைதான் சித்திரவதை (Torture)  இந்த வார்த்தைக்கான பொருளை ஒரு தரம்மிக்க ஆங்கில அகராதியில் தேடினோமானால் கிடைக்கும் அர்த்தத்தைத்ப்போல் மிகவும் ஆழமான விரிவான பொருள் தமிழில் கிடைப்பதில்லை. மிக எளிமையான, மிக சாதாரணமான அர்த்தங்களையே நம் அகராதிகள் கொண்டிருக்கின்றன.

                   அதற்காக மேற்கத்திய சமூகம் அந்த வார்த்தையின் பயன்பாட்டை பெருக்கிய அளவிற்கு நாம் பெருக்கவில்லை நாம் காந்திய வழியில் அகிம்சை வழியில் வளர்ந்த சமூகம் நம் வரலாற்றில் அந்த வார்த்தைகான தேவையே இருக்கவில்லை என்று கூறவும் முடியாது. கழுவேற்றுதல், கசையடி வழங்குதல், கண்களை பறித்தல், பெண்களை வன்புணர்வு செய்தல் போன்ற வார்த்தைகள் சித்திரவதையின் நேரடி பொருளை பிற வார்த்தைகளில் தாங்கி நிற்கிறது. இவை நமது புராண, இதிகாச, பக்தி இலக்கிய வகையறாக்களிலிருந்துதான் கிடைக்கின்றன.

                   ஒரு மேற்கத்திய சமூகம் Torture என்ற ஆங்கில வார்த்தையை பயன்படுத்தும் பொருளை இன்னமும் நமது பொது சமூகம் புரிந்துகொள்ளகூட இல்லை என்றுதான் கூறவேண்டும். வெறும் துன்புறுத்தலாகவோ, கொடிய செயலாகவோ மட்டும் காட்டப்பெறும் அந்த சித்திரவதை என்ற சொல்லுக்கு சரியான பொருத்தமான விளக்கத்தை இன்னமும் தமிழ் அகராதிகளில் காணமுடியவில்லை, அகராதிகளில் ஏன் காணவேண்டும் என்று கேள்வி எழுப்பினோமானால் மொழியானது ஒரு சமூகப் பிரதிபலிப்பு அந்த மொழி அது வளர்ச்சியடையும் காலத்தில் தான் சார்ந்த சமூகத்தின் பிரதிபலிப்பாக அந்த சமூகத்தின் தன்மையை, கருத்தியலை, அரசியலை உள்ளடக்கியே முன்னேறுகிறது அந்த வகையில் அது ஒரு கலாச்சாரப் பெட்டகமாகவும் உள்ளது. அந்த கலாச்சாரப் பெட்டகத்தை அறிந்துகொள்வதற்கான முக்கிய திறவுகோல்களே இலக்கியமும், சொற்களஞ்சியங்களும், சொல்லப்போனால் ஆங்கிலத்திற்கு இருப்பதைப் போன்று தமிழிற்கு வரலாற்று அகராதி என்று ஒன்று இல்லை அதற்கான தேவையும் இல்லை. நேர்த்தியான அழகான சொற்களும், விளக்கங்களும் கொண்ட சொற்களஞ்சியங்களை நாம் கொண்டிருக்கிறோம். அந்த சொற்களஞ்சியங்கள் சமூகத்தை பிரதிபலிப்பதை போன்று சமூகத்தின் மனசாட்சியைப் பிரதிபலிப்பவையாக அமையவும் வேண்டும் அது சமூகத்தின் மாற்றத்தின் அடித்தள துவக்கமாகவும் அமைகிறது.

                   சித்திரவதை என்ற சொல்லைத் தாண்டி அதை ஒரு பெயர்ச்சொல்லாக, வினைச்சொல்லாக பயன்படுத்தும் சமூகங்களை நாம் காணவேண்டியிருக்கிறது.

சித்திரவதை – பெயர்ச் சொல், சித்திரவதை செய், சித்திரவதைக்கு உள்ளாக்கு – வினைச்சொல்.

இதில் பெயர்ச்சொல்லாக பயன்படுத்தும் சமூகங்களாக பல இலக்கியத்தில், அரசியலில் முன்னேறிய சமூகங்கள் மாறியிருக்கின்றன. குறிப்பாக இலத்தின் அமெரிக்க நாடுகள் உலகளவில் அதிகப்படியான சுரண்டலுக்கும் வன்முறைக்கும் உள்ளானவை அந்த நாடுகள். அர்ஜெண்டினாவில் சர்வாதிகாரத்துக்கு எதிராக போராடிய போராட்டக்காரர்களாகிய மாணவர்கள், பெண்கள், ஆண்கள் என ஒரு தலைமுறையைச் சேர்ந்த பலர் கடத்தப்பட்டு, சித்திரவதைக்கு உள்ளாக்கப்பட்டு, கண்கள் பிடுங்கப்பட்டு விமானங்களிலிருந்து கடலில் வீசி கொல்லப்பட்டனர்.

hrw.org

என் எதிரியாக நிற்கும் ஒரு தேசத்திற்காக நான் அழுகிறேன். உடல்கள் விழுகின்றன, முறுக்கிக்கொள்கின்றன. பரந்த வெளியில் விசித்திரமான பனித்துகள்களாக புலப்படுகின்றன. தூய்மையான வெண்பனி இந்த உடல்களை தன்னுள் வாங்கிக்கொள்ளும். கீழே, வெண் சிகரங்கள், சற்று தொலைவில் கடற்கரை, விசித்திரமான பனிமழையாக வீசியெறியப்பட்ட அவர்களது உடல்கள், முடிவற்ற பரந்த நிலப்பரப்பின் மீது விசித்திரமான பனித்துகள்களாக.

                                                – ரோல் துரிதா

அவர்களுக்கு நீதிகேட்டு அவர்களது வயதான தாய்மார்கள் வீதிகளில் போராடி உலக மக்களின் பார்வையை திருப்பி அந்த சித்திரவதைக்கு உள்ளான மக்களுக்கு நீதியைக் கேட்டனர். அதே போல் சிலே யில் ஜனநாயக முறையில் தேர்ந்தெடுக்கப்பட்ட சோஷலிஸ்ட் அலேண்டேவின் ஆட்சியானது இராணுவத்தால் கவிழ்க்கப்பட்டு அவர் கொலை செய்யப்பட்ட பின்னர், சோஷலிஸ்டுகளுக்கு ஆதரவானவர்கள் அலேண்டேவின் ஆட்சியில் முக்கிய அங்கம் வகித்தவர்கள் தேடித்தேடி கடத்தப்பட்டு சித்திரவதைக்கு உள்ளாகி கொலை செய்யப்பட்டனர், அங்கிருந்து தப்பிய படைப்பாளர்கள், கவிஞர்களின் வாழ்க்கை வரலாறு உள்ளிட்ட எழுத்துகளால் அந்த இராணுவக் குற்றம் சர்வதேச மக்களைச் சென்றடைந்தது.

துரதிருஷ்டவசமாக,

வலி பெருகுகிறது, உலகத்தில் அனைத்து நேரங்களிலும்

ஒரு வினாடியில் முப்பது நிமிடங்களாக பெருகுகிறது, படிப்படியாக

வலியின் இயல்பு, வலி இரண்டு மடங்காக

தியாகத்தின் நிலை, இரை தேடும் மிருகமாக, கொலைவெறியுடன்,

வலி இருமடங்காக

தூய்மையான புல்லின் இயக்கம், வலி இருமடங்காக

இருப்பதின் நன்மை, நமது வலி இருமடங்காக

                                                            – செஸார் வலேயோ

மெக்சிகோவில் அமெரிக்காவின் ஊடுருவலுக்கும் அங்கிருக்கும் சர்வாதிகாரத்துக்கும் எதிராக போராடிய மாணவர்கள் போராட்டத்தில் கைது செய்யப்பட்டு சித்திரவதை செய்யப்பட்டு காணமாலடிக்கப்பட்டனர் அதிலிருந்து தப்பிய அந்த நிலத்தைச் சேர்ந்த படைப்பாளர்கள் தங்கள் படைப்புகளில் அந்த கொடுமைகளுக்கு எதிரான குரலை பதிவு செய்கின்றனர். இப்படி உருகுவேவில் படைப்பாளிகளும், கம்யூனிஸ்டுகளும்  கடத்தப்பட்டு சித்திரவதைக்கு உள்ளானதை அவர்கள் எழுதுகின்றனர். இப்படி எல் சால்வடார், கொலம்பியா, பிரேசில், கியூபா, குவாதமாலா, பொலிவியா, நிகருகா, வெனிசுலா என அந்த பிரேதசம் முழுவதும் அதிகாரத்துக்கு எதிராக போராடிய மக்களின் குரலை அடக்க அதிகாரம் பயன்படுத்திய வினைச்சொல்லாக இருந்த சித்திரவதை என்ற சொல்லையே அதிகாரத்திற்கு எதிரான பெயர்ச்சொல்லாக அந்த மக்கள் அவர்களின் படைப்புகளில் வெளிப்படுத்தினர்.

                   லத்தின் அமெரிக்காவிற்கு முன்னரே ஜெர்மனியில் நாஜிக்களின் சித்திரவதைக்கு உள்ளான யூதர்கள் அவர்களின் நினைவுகளை படைப்பாக்கும்  வழி நாஜிக்களின் வதைமுகாம்களின் கொடூரங்கள் உலகத்தின் முன்னால் இன்னமும் முன்வைக்கின்றனர். அமெரிக்காவில் வெள்ளை அமெரிக்கர்கள் ஆதிக்கத்தின் வெறியால் பொதுவெளியில் சித்திரவதை செய்து கொல்லப்பட்ட கறுப்பின அமெரிக்கர்களின் வாழ்க்கையையே அவர்கள் முன்வைத்து போராடுகின்றனர். ஐரோப்பிய வருகையால் தங்கள் நிலத்தை இழந்து காட்டுமிராண்டிகளென வேட்டையாடி கொல்லப்பட்ட பூர்வகுடி அமெரிக்கர்கள், பொய் வழக்குகளில் சிறையில் அடைக்கப்பட்டு சித்திரவதைக்கு உள்ளாகும் அந்த மக்களின் வாழ்வை பேசத் துவங்கியிருக்கின்றனர். 2009ற்குப் பிறகு ஈழத்திலிருந்து வரும் பெரும்பாலான இலக்கியங்கள் போர்ச்சூழலில் அந்த மக்கள் மீது நிகழத்தப்பட்ட வன்முறைகளைக் கூறுவதாக உலகத்தின் முன்னால் போர்க்குற்றத்தை கூறுவதாக வருகின்றன.

                   பிரெஞ்சு காலனியாதிக்க அல்ஜீரியாவில் புரட்சிகாரர்களாக, அவர்களின் ஆதரவாளர்களாக இருந்த மக்கள் இராணுவத்தால் சித்திரவதைக்கு உள்ளானதை எழுத்தாகவும் திரைப்படைப்பாகவும் கூட வெளியிட்டனர். இப்படி உலகம் முழுவதும் சித்திரவதைக்கு உள்ளான சமூகத்திலிருந்து அதற்கு எதிரான படைப்புகளும், குரல்களும், போராட்டங்களும் தொடர்ந்து எழுந்துகொண்டேதான் இருக்கிறது. அந்த மக்கள் தங்கள் நினைவுகளில் அந்த செயலின் கொடூரத்தை பதிந்து உலகின் எந்த மூலையில் அத்தகைய மனிதத்தன்மையற்ற செயல் நடந்தாலும் அதற்கு எதிராக குரல் எழுப்புகின்றனர்.

Torture in prison

businessinsider

                   “சித்திரவதை எப்போதுமே மானுடவியல் ரீதியாக ‘நாகரீகம்’ என்றும், அரசியல் ரீதியாக ‘ஜனநாயகம்’ என்றும், தத்துவ மற்றும் சட்ட ரீதியாக ‘உண்மை’  என்றும் புரிந்துகொள்ளப்பட்ட மற்றும் அனுபவிக்கப்பட்டவற்றின் கட்டுமானத்திற்குள்தான் நுழைகிறது.”

                                                                                    – இடெல்பர் அவ்லார்.   

                   நாம் இப்படி நாகரீக, ஜனநாயக, சட்டத்தின் ஆட்சி நிகழ்கிற, உண்மையை மதிக்கிற சமூகத்தில்தான் வாழ்கிறோமா என்ற கேள்வியை நாம் இன்னமும் கேட்கத் துவங்கவில்லை. இந்திய சுதந்திரமடைந்துவிட்டது என அறிவிக்கப்பட்ட நாள் முதலேயே இந்திய அரசியலானது தனது நிலவியலை பெரிதாக்க மாகாணங்கள், சமஸ்தானங்கள் என பிரிந்துகிடத்தின் நிலங்களின் மேல் தனது வன்முறையைத் துவங்கிவிட்டது. இன்னமும் அந்த வன்முறை வெறியாட்டத்தின் தொடர்ச்சியைத்தான் காஷ்மீரிலும், மணிப்பூரிலும், நாகாலாந்திலும் காணமுடிகிறது. அங்கு நிகழ்த்தப்பட்ட வன்முறைகளைப் பற்றி நாம் பேசினோமா? அந்த குரல்களை காதுகொடுத்து கேட்டோமா? அவர்களுக்காக போராடினோமா? அவர்களின் படைப்புகளை, வாழ்க்கை வாசித்தோமா? என்றால் மிகக்குறைவாகவே பதில் வருகிறது. அதிலும் அவர்கள் தேச துரோகிகள், சமூக விரோதிகள் என்ற பதில்கள் கணக்கில்லாமல் கிடைக்கலாம். அப்படியே இந்திய சமூகத்தின் வரலாறு முழுக்க ஒடுக்கபட்ட தலித் மக்களின் மீது நிகழ்த்தப்பட்ட வன்முறைகள், மனிதத் தன்மையற்ற இன்னமும் தொடரும் தாக்குதல்கள் எத்தனை அவற்றைக் குறித்து பேசினோமா? அவற்றிற்கு எதிராக போராடினோமா? கார்ப்ரேட்டுகளின் சுரண்டலுக்காக தாரைவார்க்கப்பட்ட தங்கள் நிலங்களை மலையை காப்பதற்காக மக்கள் போராடும் போது அவர்களின் மீது நிகழ்த்தப்படும் வன்முறை வெறியாட்டங்களை நாம் கேட்டோமா? நமக்கு மிக அருகாமையில் நிகழ்ந்த ஒன்று வீரப்பன் தேடுதல் வேட்டை என்ற பெயரில் காடுகளில் சிறப்பு காவல் படையால் நிகழ்த்தப்பட்ட வன்முறை வெறியாட்டங்கள் எத்தனை சித்திரவதை செய்து கொல்லப்பட்ட பழங்குடியின் ஆண்கள், வன்புணர்வு செய்யப்பட்ட பெண்கள் வாச்சாத்தி வன்கொடுமை உட்பட அவர்களுக்கு கிடைத்த நீதி என்ன காலம் தாழ்ந்த நீதி என்பது அநீதி என்று சொல்லும் சட்டம் அந்த பழங்குடிகளுக்காக என்ன செய்தது. 2009 முதல் 2015 வரை மட்டும் இந்தியாவில் நடந்த லாக்கப் மரணங்களின் எண்ணிக்கை 600 அதுவும் பெரும்பாலானோர் காவல் நிலையத்திற்கு அழைத்துவரப்பட்டு 24 மணிநேரத்திற்குள் கொலை செய்யப்பட்டுள்ளனர். 24 மணிநேரத்தில் நீதிமன்றத்தில் கைதிகளை ஒப்படைக்கத் தவறியது என்று சட்டத்தின் ஆட்சி

                   இன்றளவும் இரவு நேரங்களில் சந்தேகத்தின் பெயரில் என கைது செய்யப்படும்  தலித், இஸ்லாமிய இளைஞர்களின் மீது காவல்துறையால் நடத்தப்படும் வன்முறைகள் எத்தனை, கிராமங்களில் இன்னமும் தொடரும் சாதிய தீண்டாமையால் நிகழும் சித்திரவதைகள் எத்தனை கயர்லாஞ்சி சம்பவம் பலருக்கு நினைவிருக்கலாம்.

                   அதிகாரம் முதல் நிலையாக நம் உடல்மீது நிகழ்த்தும் வன்முறையால் நம் உடலுக்கான நமது உரிமையை, அதன் இருப்பை இல்லாது போகச் செய்கிறது. அதன் வழி சித்திரவதைக்கு உள்ளாகும் ஒரு நபரின் மனித்தத்தன்மையை அவரை இழக்கச் செய்து அவரை தான் மனிதன் என்பதை தனக்கு குரல் எழுப்ப, எதிர்க்க, முறையிட இருக்கும் அடிப்படை உரிமைகள் எதுவுமில்லை சித்திரவதைக்கு உள்ளாவதும், அதிலிருந்து எப்படி மீள்வது என்பதையும் சிந்திப்பது மட்டும்தான் முதன்மையானதாக்கி அந்த நபர் தனது இருத்தல்லை உணராது போகச் செய்கிறது. உலகம் முழுவதும் சித்திரவதைக்கு உள்ளான மக்களின் அனுபவமாக இதுதான் இருக்கிறது. நாஜி வதைமுகாம்களில் இருந்த யூதர்கள் அவர்கள் மீது நடத்தப்பட்ட வன்முறைகளின் வழி தாங்கள் மனிதர்களே அல்ல, யூதர்களாகிய தாங்கள் வாழத்தகுதியற்றவர்கள் என உணரச்செய்து பின்னர் கொலை செய்யப்பட்டனர்.

Criminal law studies nluj

                   அச்சத்தின் அடிப்படையில் வரும் மரியாதையை விட அதிக வெறுக்கத்தக்க செயல் வேறெதுவும் இல்லை…

                                                                                                ஆல்பெர் காம்யு.

                   சித்திரவதை செய்யும் அதிகாரத்திற்கு சித்திரவதைக்கு உள்ளாகும் மனிதரிடமிருந்து எதுவும் கிடைப்பதில்லை அதிகாரத்திற்கும் அது தெரியும் தனது பலம் என்னவென்பதை அந்த நபரின் உடல் ரீதியாக நிகழத்தப்படும் வன்முறையின் வழி அவனது மனதில், வரலாற்றில் பதிவு செய்வதையே அந்த அதிகாரம் விரும்புகிறது.

                        2019 ல் வெளியான The Report என்ற திரைப்படத்தின் மையக்கதை கதாநாயகன்  அமெரிக்காவில்  9/11 நிகழ்விற்குப் பிறகு சி.ஐ.ஏ உள்ளிட்ட பாதுகாப்பு நிறுவனங்களால் இனி எதிர்காலத்தில் அமெரிக்காவின் மீது இப்படியொரு தாக்குதல் நிகழக்கூடாது என முடிவுசெய்து சர்வதேச  அளவில் சந்தேகத்திற்குரிய நபர்கள் கடத்தப்பட்டு சித்திரவதைக்கு உள்ளாக்கப்பட்டு அவர்களிடமிருந்து தகவல்கள் பெறுவதாக ஒரு திட்டம் செயல்படுத்தப்படுகிறது. இதற்காக இரண்டு மனநல வல்லுனர்கள் குழுவின் கையில் அந்த திட்டம் ஒப்படைக்கப்படுகிறது, அவர்கள் மிக மோசமானதும் சக்திவாய்ந்ததுமான சித்திரவதை வழிமுறைகளை கடத்தப்பட்ட அந்த மனிதர்கள்மீது செயல்படுத்துகிறார்கள் அதன் வழி அவர்களுக்கு ஒரு தகவலும் கிடைக்கவில்லை அவர்களால் சித்திரவதை செய்யப்பட்ட நபர்கள் இறந்து போகிறார்கள். இது குறித்த முழுமையான தகவலை சேகரித்து அதனை நீதிமன்றத்தின் முன்னால், மக்களின் முன்னால் வெளியிடும் பணியை கதாநாயகன் மேற்கொள்கிறார். அந்த திரைப்படத்தின் முக்கிய செய்தியாக இருப்பது அதிகாரம் சித்திரவதைக்கு உட்படுத்தும் மனிதரிடமிருந்து எதையும் எதிர்பார்ப்பதில்லை, அந்த மனிதன் அதிகாரத்தின் சர்வ வல்லமைக்கு முன்னால் வெறும் தன் உடலை காப்பாற்றிக் கொள்ளத்துடிக்கு ஒரு சாதரண உயிரினம் மட்டுமே என புரியவைப்பதுதான் அதன் தேவை.

                   அதிகாரம் நம்மீது வினைச்சொல்லாக பயன்படுத்தும் வார்த்தையின் பொருளை அதிகாரத்திற்கு எதிரான பெயராக மாற்றி உலகெங்கிலும் பாதிக்கப்பட்ட மக்கள் பயன்படுத்துகின்றனர். நாம் இன்னமும் அந்த சொல்லின் பொருளை மனிதத் தன்மையற்றது என்றுகூட பயன்படுத்த துவங்கவில்லை. நாம் ஏன் அந்த உரையாடலைத் துவங்கவேண்டுமென்றால் மிஷேல் பூக்கோ  “சித்திரவதை விளக்குவதற்கும் அதனை புரிந்துகொள்வதற்கும் பல சிக்கல்கள் இருப்பினும் முதன்மையான பிரச்சனையாக நான் காண்பது சித்திரவதையான ஒரு பொதுக்காட்சியான மறைந்து போவதைத்தான்” என்கிறார். அப்படி உரையாடலைத் துவங்காத பொதுக்காட்சியாக இன்றளவும் நாம் கடந்து வந்ததைப் போல் கடந்து செல்லாது அதன் ஒவ்வொரு தன்மையையும் விளக்கி அந்த மனிதத்தன்மையற்ற செயலுக்கு எதிராக ஒன்றுபட்டு குரலெழுப்ப வேண்டும்.

kurdistan24

                   காவல்துறை, இராணுவம் இன்னபிற பாதுகாப்பு நடவடிக்கைகள் எவையும் அதிகாரத்தை பாதுகாக்கவே அவை அதிகாரத்தின் ஏவல் பிரிவாக மட்டுமே செயல்படுகிறது, அதே நிலையில் அந்த அதிகாரத்தின் சுவையை அறிந்த அவை தன்னளவிலும் அவற்றை செய்து பார்க்கிறது. அப்படிப்பட்ட செயல்கள்தான் காஷ்மீரில் ஒரு இரவில் குனான் புஷ்போரா என்ற இரண்டு கிராமத்தையும் அடைத்து அங்கிருந்த அனைத்து பெண்களையும் இராணுவம் வன்புணர்வு செய்தது, தேடுதல் வேட்டை என்று வாச்சத்தியில் பெண்களை காவல்துறை வன்புணர்வு செய்தது.

                        இவற்றைப் போன்ற மனிதத் தன்மையற்ற செயல்தான் மதத்தின் பெயரால், சாதி ஆதிக்கத்தின் பெயரால் பிறரை சித்திரவதை செய்வதும், வன்புணர்வு செய்வதுமாகும். சித்திரவதைக்கு எதிராக அதிகாரத்தின் வன்முறைக்கு எதிராக நாம் குரல் எழுப்புவோமானால் நமது குரல் மத, சாதிய ஆதிக்கத்தை எதிர்த்தும் நிற்கவேண்டியது நமது அவசியம்.

இங்கு இறந்தவர்களுக்காக, இறந்த நம் மக்களுக்காக

அவர்கள் தண்டிக்கப்பட வேண்டும்.

இந்த நாடு முழுவதும் ரத்தத்தைச் சிதறடித்த

அவர்கள் தண்டிக்கப்பட வேண்டும்.

இந்தக் கொலைக்கு உத்தரவிட்ட

அவர்கள் தண்டிக்கப்பட வேண்டும்.

குற்றமற்றவர்களாகத் தங்களைக் காட்டிக் கொள்ளும் துரோகிகள்

அவர்கள் தண்டிக்கப்பட வேண்டும்.

இந்த வேதனைக்கான உத்தரவைப் பிறப்பித்த

அவர்கள் தண்டிக்கப்பட வேண்டும்.

இந்தக் குற்றத்தை நியாயப்படுத்திய

அவர்கள் தண்டிக்கப்பட வேண்டும்.

எங்கள் ரத்தத்தில் நனைந்த அவர்களது கைகள்

எனக்குத் தேவையில்லை

அவர்கள் தண்டிக்கப்பட வேண்டும்.

அவர்கள் தூதர்களாக இருக்கக்கூடாது.

அவர்கள் வீட்டில் அமைதியாக இருக்கக்கூடாது.

இந்த இடத்தில், இந்தச் சதுக்கத்தில்

அவர்கள் விசாரிக்கப்பட வேண்டும்.

அவர்கள் தண்டிக்கப்பட வேண்டும்.

                                                – பாப்லோ நெருதா.

                   சித்திரவதைகள், அதிகாரத்தின் வன்முறைகள் குறித்த படைப்புகள் எழுதப்படுதலும், அவை வாசிக்கப்படுதலும் அவசியம். தமிழில் மிகக் குறிப்பாக சொல்வோமானால் சந்திரகுமாரின் லாக்கப், ரா.கி. ரங்கராஜன் மொழிபெயர்ப்பில் வெளிவந்த ஹென்றி ஷாரியரின் பட்டாம்பூச்சி இவற்றைத் தவிர்த்து காவல்துறையின் சித்திரவதைகள் குறித்து மிகத்தீவிரமாக பேசிய படைப்புகள் குறைவு. உலகளவில் அதிகாரத்திற்கு எதிராக சிறை சென்று கொடுமைகளை அனுபவித்த மக்களின் குரல்களாக வெளிவரும் சிறையனுபவ எழுத்துக்கள் வாசிக்கப்படவேண்டும். அப்படிப்பட்ட இலக்கியங்கள் இப்போதுதான் தமிழில் மொழிபெயர்த்து வெளியிடப்படுகின்றன. லியோனார்ட் பெல்டியர், முமியா அபு ஜமால் போன்றோரின் எழுத்துகளின் எழுத்துகள் விடியல் பதிப்பகத்தால் தமிழில் வெளியிடப்பட்டுள்ளன. அதிகாரத்திற்கு எதிரான மிக பலம் வாய்ந்த இயக்கம் மொழியும், இலக்கியமும், மக்களுமே. அதனால்தான் இதற்கான உரையாடலை மொழியிலிருந்து துவங்குவது அவசியமானதாகும்.

ஜூன் 26 சித்திரவதைக்கு ஆளானோருக்கான சர்வதேச ஆதரவு நாள், இந்நாளில் நாம் அதிகாரத்தின் பெயரால், இன, மொழி, மத, சாதி வேற்றுமைகளின் பெயரால் நடத்தப்படும் சித்திரவதைகளையும் இணைத்து நாம் ஒன்றிணைந்து எதிர்க்க வேண்டியது அவசியம்.

உரையாடலை துவங்குவதன் மூலமாக மட்டும்தான் ஒரு சமூகப்பிணியை ஒழிக்கமுடியும் அதை மூடிமறைப்பது அதை வளர்த்தெடுக்கவே செய்கிறது. எந்தக் குற்றம் புரிந்தவரானாலும் மரண தண்டனையோ, மனிதத் தன்மையற்ற சித்திரவதைகளோ கூடாது என்பதே ஒரு மித்த மனிதத்தின் குரலாக இருக்கவேண்டும்.

துணைநூற்கள்:

1. லியோனார்ட் பெல்டியர், சூரியனைத் தொடரும் காற்று, தமிழில் : எஸ். பாலச்சந்திரன், விடியல் பதிப்பகம், கோவை, 2004.

2.முமியா அபு ஜமால், முமியா: சிறையும் வாழ்வும், தமிழில்: வெ. கோவிந்தசாமி, விடியல் பதிப்பகம், கோவை, 2006.

3. முமியா அபு ஜமால், முமியா: சிறையும் மரணமும், தமிழில்: வி. நடராஜ்,

விடியல் பதிப்பகம், கோவை, 2006.

4. Michel Foucault, Disipline and Punish, Translated by Alan Sheridan, Penguin Books, London, 1991.

5. Swati Sengupta, Out of War: Voice of Surrendered Maoists, Speaking Tiger, New Delhi, 2016.

6. Raul Zurita, INRI, Translated by William Rowe, NYRB Poets, New York,2018.

7. Carlos Liscano, Truck of Fools, Translated by Elizabeth Hampsten, Vanderblit University Press, 2004.

8. Pablo Neruda, Canto General, California University Press, 2002,

தமிழில்: கண்ணன் எம். தலித் முரசு.

9. மு. சந்திரகுமார், லாக்கப், டிஸ்கவ்ரி புக் பேலஸ், சென்னை, 2018.

10. Aparna Vaidik, My Sons of Inheritence, Aleph Books, 2020.

11. John Gibler, Torn From the World, City Lights Books, 2018.

12. ஹென்றி ஷாரியர், பட்டாம்பூச்சி, தமிழில்: ரா.கி.ரங்கராஜன், நர்மதா பதிப்பகம்.

13. Cessar Vallejo, (The Nine Monsters),The Complete Poetry Cesar Vallejo, Translated by Clayton Eshleman, University of California Press, California, 2007.

LEAVE A REPLY

Please enter your comment!
Please enter your name here